qu’ils ayent à le receuoir, & souffrir qu’il y
fasse sa demeure actuelle en toute liberté &
franchise sans refus, opposition ou empeschement,
& lui laisser viure comme il est
licite à personne de sa qualité, & qui à l’honneur
d’estre Cardinal & Prince de l’Eglise, le
tout à la recommandation de sa Majesté, &
ce auec tel nombre d’Officiers & domestiques
qui lui seront necessaires.

C’est bien auec vn grand regret qu’il a fait
ces instances au Roy de se retirer la necessité
l’y ayant obligé, mais pourtant il le fera au
plus tard qu’il lui sera possible, selon le conseil
que lui donnent ses Partisans, adherans
& mercenaires, qui sçauent tres bien que
leur fortune, aduancement & leur subsistance
ne dépend que de la sienne, & que
n’estant plus en France, il leur seroit difficile
de s’y maintenir auec seureté de leurs personnes
qui sont haïs de tout le peuple pour
leurs pernicieux conseils, par lesquels ils ont
entretenu ce Cardinal Mazarin en son Ministere
qui n’a fait tant d’entreprises méchantes
& damnable, que par leurs aduis & poursuites ;