Le plus deffiant de nos Roys establist ses affaires,
principalement pour auoir volontairement
abandonné & commis sa vie, & sa liberté, en les
mains de ses ennemis : montrant auoir entiere fiance
d’eux, afin qu’ils la prinssent de luy. A ses legions
mutinées & aimées contre luy, Cesar opposoit seulement
l’authorité de son visage, & la fierté de ses
paroles ; & se fioit tant à soy & à sa fortune, qu’il ne
craignoit point de s’abandonner & commettre à vne
armée seditieuse & rebelle.

Mais il est bien vray, que ceste forte asseurance ne
se peut representer bien entiere, & naïfue, que par
ceux ausquels l’imagination de la mort, & du pis qui
peut aduenir apres tout, ne donne point d’effroy, car
de la representer tremblante encore, douteuse & incertaine,
pour le seruice d’vne importune reconciliation,
ce n’est rien faire qui vaille. C’est vn excellent
moyen de gaigner le cœur & volonté d’autruy,
de s’y aller sousmettre & fier, pourueu que ce soit
librement, & sans contrainte d’aucune necessité,
& qu’on y apporte vne fiance pure & nette ; le front
au moins deschargé de tout scrupule. Ie vis en mon
enfance, vn Gentil-homme commandant à vne
grande ville empressé à l’esmotion d’vn peuple furieux :
Pour esteindre ce commencement du trouble,
il prit party de sortir d’vn lieu tres-asseuré où il estoit
& se rendre à cette troupe mutine : d’où mal luy prit,
& y fut miserablement tué. Mais il ne me semble pas
que sa faute fut tant d’estre sorty, ainsi qu’ordinairement
on le reproche à sa memoire, comme ce fut
d’auoir pris vne voye de soûmission & de mollesse : &
d’auoir voulu endormir cette rage, plutost en suiuant
qu’en quittant, & en requerant plutost qu’en remontrant :