veritables & desinteressées, pour suppleer à ce
que ie n’ay point remarque dans ce discours vn peu hasté,
& pour inuiter vn troisiesme soustenant plus fort &
plus solide que nous, qui fasse connoistre à tout le monde,
l’imposture de ce Paradoxe, & la malice de celuy qui
s’en dit l’Autheur.

Il est vray que la grandeur du Parlement de Paris que
l’on veut abaisser par les iniures & les inuectiues de cette
satire abominable, n’auroit besoin d’autre deffense que
de sa propre authorité, si tous les hommes estoient capables
de connoistre ce qu’il est, & discerner la verité
d’auec le mensonge. Mais puis qu’on veut surprendre
les simples, & tromper ceux qui croyent tout ce qui est
imprimé, il importe pour la satisfaction des gens de
bien, & pour l’instruction des bons François, qu’on
fasse voir l’erreur de tant de calomnies, & qu’on donne
vne connoissance sommaire du pouuoir & de la maiesté
de ce Tribunal des Dieux, qui est l’vnique & veritable
support de cette Monarchie. C’est ce que nous entreprendrons
plus amplement dedans la suite de ces propositions
apres que Dieu nous aura donné les moyens &
le temps de publier cet ouurage, qui ne sera pas moins
vtile & agreable à tous les fidelles sujets du Roy, qu’important
& necessaire à ceux qui ayment la justice, & le
repos de l’Estat.

Et parce que ce premier projet, & cette premiere partie
est vn peu longue, & plus estenduë que les pieces ordinaires
qui occupent tant de plumes, & tant d’esprits
curieux ; ie l’ay diuisée par sections, & donné des titres
aux questions les plus belles & les plus considerables, afin
que l’ordre en soit moins confus, & le Lecteur plus soulagé,
suiuant la Table que voicy.