tesmoignée, me font croire qu’ayant vn esprit excellent, comme
il a, il faira de si bonnes reflexions sur l’iniustice de ses armes,
qu’il les tournera contre ceux qui l’ont engagé dans vne
entreprise si mal digerée. Et quant à moy, SIRE, ie vous
confesse que le Ciel ma puny tres-iustement, de me faire perir
en cette guerre ; car ie la faisois contre ma conscience & contre
mes plus legitimes sentimens, & ie suiuois aueuglement, mais
à contre-cœur ce Prince, pour l’obliger à me continuer ses faueurs ;
car pour auoir eu aucune bonne volonté pour le Mazarin,
ie vous asseure, SIRE, que ie n’en eut iamais, & il n’y a
personne en toute son armée, ny mesme en toute la maison du
Roy & dans la sienne, qui ne voulut luy auoir mangé le cœur,
car il n’y iamais obligé personne de bonne grace ; au contraire
son insatiable auidité, l’a empesché de recompenser la vertu,
& il n’y a iamais eu que les sangsuës, qui luy ont aydé à piller &
saccager les Prouinces, qui ayent esté fauorisées de luy : Bref,
SIRE, il est en execration à tous les gens de bien : & sans le
respect qu’on porte au Roy & à la Reyne, proche desquels il
se tient iour & nuit, il n’y a point de doute, qu’il auroit esté
chassé ou chastié il y a long-temps.

Cependant que le braue Chastillon racontoit toutes ces
choses, tous les Heros qui estoient auec le Roy, estoient estonnez
au possible, & deploroient le malheur de la France : Mais
le Mareschal de Vitry, qui auoit ouy tout ce discours, s’adressa
le premier au Roy, & luy dit : Ha, SIRE, que ce coquin de
Mazarin fait mal son profit du chastiment, que vostre Maiesté
fit faire par ma main au Mareschal d’Ancre ; il deuroit apprehender
vn pareil traittement, & deuenir sage par le malheur
d’autruy : à quoy le Roy respondit, Vous dites vray, mais ie
vois bien que son ambition l’a porté si haut, qu’il ne peut plus
voir ce qui le peut sapper & faire trébucher. Et alors le Cardinal
de Richelieu se prenãt à rire, adressa sa parole au Roy, & luy
dit, SIRE, ie vois bien en effet que ce pauure malheureux est
semblable à ceux, qui pour estre éleuez au haut de quelque
lieu eminent, la teste leur tourne & ils ne font que chanceler,
iusques à ce qu’ils tombent tout à fait, & qu’ils se rompent le
col : s’il auoit eu le cœur & le ceruau aussi forts que celuy qui la