parens du Suppliant, & sans qu’il en sceust rien, en
presence de plus de cinquante personnes d’honneur,
mesmes d’aucuns de Messieurs du Parlement, qui
luy auoient fait la grace de le venir visiter, & ce tant
à cause que l’heure assignée par Messieurs les Commissaires
estoit passee, & que d’ailleurs le sieur Menard
Chirurgien, auquel les parens du Suppliant auoient
beaucoup de confiance, tesmoignoit estre pressé de
s’en retourner : & pourtant cet appareil fut leué vne
seconde fois en presence desdits sieurs Commissaires,
ainsi qne la Cour voit par le rapport qui en a
esté fait par les Chirurgiens, qui asseurent que les blessures
ne peuuent auoir esté faites que par les bales du
pistolet, contre la pensée de quelques vns, qui vouloient
dire que le Suppliant s’estoit blessé aux quenoüilles
de son carrosse.

L’on a encores affecté de faire dire à vn tesmoin,
entendu à la requeste de Monsieur le Procureur general,
qu’il auoit oüy dire au cocher du Suppliant,
que sans la bonté de son Maistre il auroit arresté celuy
qui l’auoit blessé ; mais outre que cette circonstance
ne se trouue point dans la deposition de ce cocher
qui a esté entendu, le Suppliant n’auoit-il pas raison
de n’estre pas abandonné de son cocher, n’ayant personne
aupres de luy pour le conduire chez vn Chirurgien ?

C’est donc vne malice iettée à dessein dans l’esprit