PRECEPTES DE CHARLES NEVFIESME
Roy de Suede à son Fils, Gustaue Adolphe apres lesquels
ledit Charles vescut encore huict ans l’appriuoisant son
ieune aiglon aux armes.

1. Il faut premierement sçauoir qu’vne Couronne
est bien pesante, si les fidels suiets,
seruiteurs n’en soustiennent la moitié & sa
vertu l’autre.

2. Qu’il ne faut iamais faire par ses Lieutenans ce qu’il
pourra dignement faire luy mesme.

3. Qu’il voye tout, qu’il oye tout, qu’il pouruoye à tout.

4. Qu’il n’ait point de fauoris que les vaillans & les sages.

5. Que du miel de ses abeilles il ne saoule point les
frelons.

6. Que d’habilles hommes facent d’en en an le tour de
l’Europpe, pour attirer à son seruice les personnes du plus
haut merite.

7. Qu’il apprenne plusieurs langues afin d’aimer plusieurs
nations & d’estre aimé d’iceluy.

8. Qu’il puise dans les sciences tout ce qu’il en faut
pour façonner son iugement, pour discerner le iuste
d’auec l’iniuste le vray d’auec le faux & l’apparent d’auec
le veritable.

9. Qu’il apprenne le moyen de s’acquerir les cœurs
qu’il ait le visage ouuert & le cœur ferme & que tout son
procedé soit loyal & royal.

Page précédent(e)

Page suivant(e)

---

Anonyme [1649], MIROIR ROYAL OV FIDELE POVRTRAICT DV MONARQVE ACCOMPLY. TIRÉ AV MODELLE D’VN GRAND Gustaue Roy de Suede. A MONSIEVR HAMBREVS DOCTEVR en droit Canon, & Professeur du Roy és langues Orientales. , françaisRéférence RIM : M0_2481. Cote locale : A_6_18.

---