Anonyme [1649], MAXIMES FONDAMENTALLES, TOVCHANT LE GOVVERNEMENT & les pernicieux desseins des Espagnols , françaisRéférence RIM : M0_2425. Cote locale : A_6_34.
-- 12 --
il osta la Nauarre à sa propre Niepce ; s’ils ne
se fussent pas seruis du pretexte de l’alliance & du
mariage d’Angleterre, ils n’eussent pas pris si facilement
le Palatinat.
XII.
Il ont le dessein de deuenir Monarques de tout
le monde.
Ils le disent eux-mesme, & ne s’y feignent pas ;
Ceux qui les flattent parlent d’eux comme d’vne
Monarchie naissante aux Indes, ils disoient le Roy
d’Espagne est Empereur de tout le monde, & comme
ils le disent chacun les en croit, les Italiens,
les Allemands, les Anglois & les François s’en
sont plaints depuis Charles-Quint, ce n’est pas
vne plainte legere : mais vne publique profession
que ces Espagnols font aux yeux mesme de sa
Saincteté & de toutes les Nations de la terre ;
C’est vne croyance qu’ont tous les Peuples de
l’Europe qui ne peut estre mal fondée, puis que
les Espagnols font tous les iours tout ce qu’ils
peuuent pour y paruenir.
Anonyme [1649], MAXIMES FONDAMENTALLES, TOVCHANT LE GOVVERNEMENT & les pernicieux desseins des Espagnols , français Référence RIM : M0_2425. Cote locale : A_6_34.
|