le Roy mesme estoit sa partie, ce fut à la poursuite
du Procureur general.

N’a-t’on point fait de remonstrances auparauant
que de donner Arrest contre le Cardinal Mazarin ?
Nous sçauons comme elles ont esté frequentes, &
qu’enfin la Reyne declara qu’elle l’auoit esloigné
sans esperance de retour.

Tous les Arrest prononcez contre le Cardinal
ont donc esté rendus dans toutes les formalitez du
Royaume ; ils ont vn fondement juste, la Loy y estoit
formelle, les Parlemens n’ont point excedé leur
pouuoir.

Mais il n’a pas seulement esté condamné par les
Arrests, il a encore esté condamné par le Roy, par
vne Declaration verifiée dans sa Majorité, car la verification
en fust faite le Mercredy, & dés le Mardy
le Roy estoit Majeur.

Cette Declaration n’a point esté extorquée, il y
auoit sept mois entiers que le Mazarin estoit hors
du Royaume. Tout estoit dans le repos & dans le
calme : ce fut au milieu des acclamations publiques
& de la pompe de la Cour que cette Declaration fut
enuoyée. On n’a iamais rien veu de plus solennel,
rien de plus libre. Les Declarations du Roy sont inuiolables,
il ne les peut mesme reuoquer quand elles
sont vne fois verifiées, parce que le Roy n’est iamais
contraire à luy-mesme. On nie la Puissance de
Dieu (quelque infinie qu’elle soit) dans les choses
qui se contredisent, ce seroit vn deffaut dans
la Puissance & dans l’Authorité de destruire ce