auions beaucoup plus de dents. Ils occuperẽt auec vne
diligence incroyable tous nos dehors, auant que nous
eussions ny caualier, ny fantassin sur pié, parce qu’ils
auoient les leurs tous prests depuis le retour de Flandres ;
& quand ils n’eussent tenu que S. Denis & Gonesse,
ils croyoient en auoir assez pour nous faire ieusner ;
mais apres s’estre saisis de Melun & de Corbeil,
qui sont deux mammelles de Paris, enfin ayant bousché
tous les passages, tant de la terre que des riuieres,
ayant fulminé par des Declarations, & par des Arrests
du Conseil contre les Parisiens, comme contre des reuoltez,
apres les auoir menacez du mesme traitement
qu’ils auoient fait aux Laboureurs : c’est à dire de brulemens,
meurtres, violemens, sacrileges, & autres
cruautez que l’histoire ne leur pardonnera iamais,
ayant outre cela dans Paris vne armée bien plus dangereuse
que celle des Allemands, & des Polonois,
puis qu’ils y ont tout autant d’espions, & de fauteurs,
qu’il y a de lasches, & d’vzuriers, auec tous ces auantages
n’auoient-ils pas raison d’esperer vn bon succez
d’vne si mauuaise entreprise, & les Parisiens ne sont-ils
pas dignes d’vne loüange eternelle de s’y estre vigoureusement
opposez, & de n’auoir iamais relasché
de leur resolution parmy tant de suiets de desespoir ?

C’est vne maxime dans la Morale, & dans le Christianisme,
qui est la morale du Ciel, que la gloire des
belles actions se mesure par leur propre difficulté, tellement
que plus les Parisiens ont surmonté d’obstacles,
plus aussi leur en reuient-il d’honneur. Il semble
que pour les en combler tout ce qu’il y a de fascheux,