Outre que si elles s’adressent à des personnes vn
peu sensibles & vn peu iudicieuses, elles courent risque
d’estre punies des mesmes armes dont elles outragent
leurs adorateurs auec double vsure. Et n’estimez pas,
(quelque belle & quelque esleuée que vous puissiez estre
au dessus de vous mesme) vous voir à iamais exempte de
ces infortunes, ou à couuert de ces disgraces. Ce sont des
reuers qui surprennent les plus fines & les plus imperieuses,
lors qu’elles y pensent le moins, & qu’elles s’imaginẽt
estre au faiste d’vne felicité passagere. La presomption
est vn vice qu’on ne sçauroit auoir assez en horreur, &
que les Dieux mesmes ne considerent qu’auec des foudres
tonnans à la main, pour la punition des ames qui seront
tachées de l’enormité de ce crime. Que si vous ne
trouuez rien d’assez touchant sur ce nombre infiny de
tant d’obiets qui vous aprochẽt, ou que vous iugiez vniuersellement
tout le mõde indigne de la moindre de vos
graces ; prenez garde que les traits que vous prenez plaisir
de lancer sur ces pauures idolatres, ne reflechissent sur
vous, & que vostre miroir en le consultant ne vous rende
idolatre d’vne beauté si esclatante & si funeste que la vostre.
L’exemple de ce miserable Narcisse, dont ie vous ay
si souuent entretenuë, vous doit faire aprehender vn pareil
sort, ou du moins quelque fin de semblable nature.
Les immortels que vous deuez craindre d’irriter contre
vous, ne furent pas plus fauorables aux accens des filles
de l’Air, qu’ils le seront aux sanglots des fils des Princes.
Nemesis est vne Deesse qui ne s’occupe qu’à chastier l’ingratitude
de ceux qui ne veulent pas exaucer les prieres
qu’on leur fait, & qui se raillent des plaintes d’vne passiõ

Page précédent(e)

Page suivant(e)