rougir l’escarlatte dessus vos espaules que pour vous
faire rougir de honte & de vergongne. Aduoüez
maintenant auec moy que vostre mauuais conseil
vous empesche bien de iouyr d’vn bon-heur, &
de gouster les plaisirs d’vne vie paisible & contente,
reconnoissez vostre faute, & preparez
vous à souffrir des liens & des chaisnes dont on
vous chargera le corps comme à vn insencé, &
à vn furieux, & le tout pour vos lasches démerites.
Que si ie seme mes paroles en l’air, à tout
le moins ie vous inuoque tres sage Parlement,
vengez vostre iniure sur ceste teste infidelle, que
celuy là meure qui a rompu sa foy, que celuy là
meure qui a voulu tromper vne innocente Reyne,
que celuy-là meure qui est des-ja mort au
monde d’vne mort Ciuille, & si vous cognoissez
cet execrable, escoutez mes deuotes prieres,
où ie vous appelle pour vangeurs, & si vous l’auez
veu prophaner vos Autels, il ne faut pas que
vous tardiez à les lauer du sang de ce prophane.

Grand Dieu ne permettez point que l’impieté
triomphante iniustement de l’innocence me fasse
long temps doubter si vous auez soing des affaires
de ce monde, ou si tout se regit par la conduitte