Lon ne peut dire pour quel crime
Sadite Saincteté supprime
Ses six Ordres deuotieux,
Remplis de bons Religieux.
Mais surquoy ne veut elle mordre,
De sainct François, l’excellent Ordre
Se voit reduit à la moitié,
Ce qui fait dire par pitié,
D’où vient S Pere que tu panches
A retrancher les bonnes branches
De cét Arbre si glorieux,
Qui de saincts a peuplé les Cieux,
Dis-nous par quel misere estrange
Des Disciples du grand Archange,
Tu laisse les bons Capucins
Et supprime les Tiercelins :
Mais pardon, le zele m’emporte,
Ie peche parlant de la sorte,
Et si i’en dis encore vn mot,
Ie passeray pour Huguenot.