LES SOVHAITS
DE LA
FRANCE
A M. MONSEIGNEVR
LE DVC
D’ANGOVLESME.
GRAND Prince, ie sçay que vous compatissez à ma disgrace,
& que vous meslez de bon cœur vos larmes auec les
miennes ; & puis qu’il vous fasche extrémement de me
voir auiourd’huy reduite au plus déplorable estat où ie
pouuois iamais estre, ie m’addresseray à Vostre ALTESSE, pour
l’entretenir de ma douleur ; & pour luy demander quelque remede
aux maux qui m’accablent, & qui infailliblement me vont faire perir,
si vous n’accourez à mon secours.
Vous auez vne longue & triste experience des calamitez que
i’ay endurées ; & sans vous obliger de relire les guerres que i’ay euës
contre les Anglois, & contre Charles le Quint, & Philippes II. il
me suffit de vous dire, que vous estes venu au monde durant les
troubles des Religionnaires, & dans la plus facheuse saison de cette
Monarchie. Vous auez veu naistre la Ligue & les autres guerres
qu’elle a produit, & ie m’asseure que vostre esprit fremit encore
des spectacles d’horreur qui ont paru en ce temps là sur mon theatre.
La felicité du Regne de Henry IV. en auoit reparé toutes les
pertes, & les François ne se souuenoient plus des maux soufferts
& des disgraces passées. Sous Louis XIII. les miseres publiques
ont repris de si profondes racines, qu’elles subsistent encore : Et les
peuples extremément lassez, & autant affoiblis par les victoires que
par les pertes, estoient à la veille de respirer & de iouïr d’vn bien-heureux
repos.
Anonyme [1649 [?]],
LES SOVHAITS DE LA FRANCE A M. MONSEIGNEVR LE DVC D’ANGOVLESME. , français
Référence RIM : M0_3700. Cote locale : A_7_36.