Tant sur la terre que sur l’onde,
Parmy les Espagnols vaincus,
Ceux qui cherissent mieux Baceus,
Sauuent leur vie par la fuite,
Et c’est la meilleure conduite
Dont iamais ils pourroient vser,
Pour ne laisser point escraser
Leurs corps par quelques mousquetades
Qui les rendroient plus que malades,
Lors qu’ils sont sortis du peril
Leur esprit paroist si gentil,
Qu’ils ne parlent que de leur gloire,
Et de l’honneur de leur victoire ;
Ils content combien à la fois
Ils ont fait mourir des François
Auec vn seul coup de leur glaiue,
Plus contants qu’vn Roy de la fève,
Ne donnent loisir ny repos
A leur langue qui dit des mots
Aussi faux qu’ils sont agreables,
Ils se disent impitoyables,
Inuincibles & sans effroy,
Leur main met tout en desarroy,
Leur valeur n’a point son esgalle,
Ny leur espée martialle ;

Page précédent(e)

Page suivant(e)