celebré ses auantages : te dirai-je aussi son defaut, ou plutost
son excés, qui l’a conduit dans le precipice, lors qu’il
croyoit par là s’esleuer au comble de la gloire & de la
grandeur. Sa ieunesse l’empeschant de mettre des bornes
à ses desirs, il crût que la fortune luy seroit aussi fauorable
combatant contre ses amis, qu’il la trouua propice,
faisant la guerre à ses ennemis. Imprudent qui ne
s’apperceut pas qu’il auoit tousiours combatu sous les
auspices de deux ou trois princes que les astres virent en
naissant d’vn œil plus fauorable que luy : & que si leur
bon genie l’auoit tousiours assisté lors qu’il tiroit l’espée
en leur faueur, il l’abandonneroit si tost qu’il auroit
l’audace de penser à la tremper dans le sang d’vn de leur
nombre, au dessein de s’acquerir par là vne préeminẽce,
qui ne l’eust pas moins destruit vaincœur que vaincu.
C’est beaucoup de ce que ie viens d’exprimer : mais ô
sacrés motifs d’aliance, qui fistes porter le nom de frere
à deux Princes, dont l’vn espousa la sœur de l’autre,
n’aurez-vous donc non plus de pouuoir icy que vous en
eustes autrefois à Rome, au temps de Pompée & de Cesar ?
ou ne seruirez que de couuerture aux mouuemens
de leur ambition, qui les porte à se destruire l’vn & l’autre
en leuant les défiances & les ombrages qu’autrement
on pouuoit auoir de leur dessein. Ce braue Duc de Nemours,
auoit espousé la sœur de ce grand & fameux Duc
de Beaufort, qui fut tousiours mes delices & mon apuy :
cette alliance contractée auec beaucoup de solemnité,
faisoit croire que ce ne seroit desormais qu’vne ame en
deux corps, & que la maison de l’vn & de l’autre en estoit
beaucoup fortifiée. I’en ressentis vne ioye excessiue que
ie fis esclater par des signes trop visibles, pour n’y pas faire participer
tout le reste de la France ; & cependant, ô
mal-heur qu’on ne peut assez déplorer ! coup fatal qui
tranche vn des doigts de ma main ! & prodige que
les siecles à venir croiront à peine. Celuy qui prist alliance
en la maison de l’autre, ce Prince si iudicieux
& si sage, pourueu de si belles mœurs, & qui

Page précédent(e)

Page suivant(e)