Les poissons n’ont point tant d’arrestes,
La Bourgogne tant de raisins,
La Noblesse tant de cousins,
Les cocus n’ont point tant de cornes,
Les heritages tant de bornes,
La Lune tant de changemens,
Les iours n’ont point tant de momens ;
Les hayes n’ont tant de prunelles,
La Gazette tant de Nouuelles.
Le Mans n’a point tant de chappons,
Les Colleges tant de frippons,
L’Espargne n’a tant de finances,
Les Roys n’ont fait tant d’ordonnances.
Les lacquais ne font tant de pas,
Les fanfarons tant de combats,
Ny les Prestres tant de Seruices,
Estampes n’a tant d’escreuisses.
Saint Iacques n’a tant de bourdons,
Les Rotisseurs tant de lardons,
Les zelez n’ont point tant d’extases,
Les Pedans n’ont point tant de phrases.
Tabarin n’a point tant d’onguents,
Et Vendosme n’a tant de gands :
Rome n’a point tant de merueilles,
Et les banquets tant de bouteilles,
Margot n’a tant fait d’eschaudez,
Gallet n’a tant poussé de dez.
Le Monde n’a point tant d’années,
Et cent mil ans tant de iournées,
Les greniers n’ont point tant de rats,
Les galeres tant de forçats,
Les Parpaillots tant de rebelles,
Ny les filoux tant de querelles :
Les belles n’ont tant de poullets,
Liesse tant de Chappelets.

Page précédent(e)

Page suivant(e)