& comme ce Parlement de Paris representoit
l’Assemblée generale des Estats du Royaume,
qui en est comme l’abregé ; & defait, nous
y voyons encores aujourd’huy l’Eglise representée
par vn nombre de Conseillers Clercs ; Nous
y trouuons la Noblesse dans les personnes des
Princes du Sang & des Ducs & Pairs de France,
qui y ont seance, & qui sont les premiers de la
Couronne : Enfin le Corps entier, qui est vn
Corps mixte, qui y represente tous les Ordres du
Royaume : Aussi depuis l’establissement de ce
Parlement de Paris, il ne se lit point que dans le regne
d’aucuns de nos Rois, il ait esté transferé ailleurs ;
que si sous le regne du Roy Henry le
Grand, il y auoit à Tours vne forme de Parlement,
il n’estoit composé que de ceux qui auoient
épouse sa cause & son party, car le Parlement de
Paris ne fut point interdit, il estoit tousiours le
premier & celuy qui condamna les propositions
d’Espagne de faire vn Roy de France autre que du
Sang Royal, & autre que le feu Roy Henry le
Grand, qu’il recognoissoit seul Roy legitime : ce
qui passa pour Loy.

Secondement, il n’y a que le Parlement de Paris,
où le Roy à son lict de Iustice, à l’exemple de
cet Auguste Tribunal, sur lequel il estoit toûjours