& que ce qu’ils auoient voulu faire passer pour la descharge
& le soulagement du peuple estoit vn nouueau crime,
Ils prennent la resolution de maintenir encore leur tyrannie
par la force & la violence, & d’enleuer du Parlement ceux
qui leur faisoient ombrage, & qui en conseruoient la dignité.

Ayant gaigné heureusement vne bataille, qu’ils auoient
dessein de perdre, pour rejetter sur les Assemblées du Parlement
la cause de la deffaite, ils ne laissent pas de s’imaginer
par apres qu’ils se pourront aussi bien seruir de la Victoire, &
que dans leur succés il n’y aura rien qu’ils ne puissent entreprendre
sur la seureté publique. Tellement qu’à l’issuë d’vn
Te Deum glorieux, & pendant les acclamations des peuples,
l’on arreste prisonnier Monsieur de Broussel, Monsieur de
Blasmenie President aux Enquestes, l’on enuoye des lettres
de Cachet à Monsieur Laisné, à Monsieur Loysel, à Monsieur
Benoise, & à plusieurs autres Conseillers. L’on va encore
à main armée au logis de Monsieur Charton President des
Requestes du Palais pour se saisir de sa personne, il y a encore
beaucoup d’autres que l’on prepare pour vn sanglant sacrifice,
& pour immoler à la passion & à la vengeance du Cardinal
Mazarin & de ses complices, qui comme ces oyseaux
de proye, ou ces bestes de carnage, ne se repaissoient que de
sang, & encore du plus innocent & du plus pur.

Les Habitans de Paris ayant donc consideré cette action
auec horreur, & que l’oppression du Parlement estoit vne asseurance
infaillible de leur ruïne, & de tous les subjets du
Roy ; Ils prennent les armes pour redemander leurs Peres &
leurs veritables Protecteurs, parce qu’ils sçauoient bien que
la porte de la Iustice estoit fermée il y auoit long-temps, &
qu’il n’y auoit que la force & l’espouuante qui peust obliger
les Ministres de les rendre, & empescher les conspirations
qu’ils auoient faites sur des testes si Illustres & si precieuses à
l’Estat.

Le Parlement neantmoins se contente de la liberté de ses
prisonniers, & des relegués dans les Prouinces, quoy que dans
cét estat il peust perdre facilement ses ennemis, qui estoient
à la mercy de deux cent mil hommes sous les armes, & qui
estoient maistres de leur vie & de leur salut.