deuoir tomber sur ma teste, & le Tyran s’efforça
de le faire éclater sur l’Etat de la Republique
des Venitiens, où il a reçeu plus de perte, par la
genereuse & vaillante resistance des Candiots,
que son orgueil, & son ambition ne luy auoient
pas fait imaginer.

Ce puissant regne des Turcs, qui est aujourd’huy
si grand & si redouté, & la famille des Roys
Ottomans est si nouuelle, & si peu ancienne, que
c’est vne chose émerueillable, comme elle s’est pû
augmenter en si peu de temps ; veu qu’il n’y a pas
deux cens cinquante ans, qu’on commence à les
connoistre, & à les nommer. C’est pourquoy i’ay
tousiours creu que ça été vn fleau, qui par la permission
de Dieu, s’est étendu sur la terre, pour chastier
les Chrestiens des obeïssans aux loix de Dieu
leur Createur : ainsi qu’il enuoya iadis vn Antiochus,
vn Nabuchodonosor, vn Cyrus, & de tels
autres Princes, qui opprimoient son peuple éleu.

C’est ce qui m’a tousiours fait croire, & ce qui
m’a consolée, mesmes dans mes plus grandes afflictions,
que si le Createur qui fait toutes choses
comme il veut, n’eust permis que cette race Turquesque
regnast pour vn temps, que sans doute
le glorieux dessein de l’vn des plus grands Roys de
France, comme des plus Saints, eust heureusement
& saintement reussi. Cependant l’experience
nous a fait voir qu’il mourut en vne si glorieuse
entreprise, & que Dieu ne permit pas qu’il obtint