ie me soucie peu, pourueu que i’aye tousiours
l’esprit de Monsieur, ie mettray bien tout le reste
à raison.

Mazarin. Pleust à Lucifer que ie peusse faire
de mesme, car ie ne vous celeray point, que ie
commence maintenant à apprehender ; Ie n’ay
plus aucun repos, & ie n’attends à toute heure
que la mort ; tellement ie me defie de tout
le monde, & presque de moy-mesme.

La Riuiere. Ces terreurs paniques ne siéent
pas bien à vn esprit fort comme le vostre : Esperez
en la Reine, en Monsieur, en Monsieur le
Prince, en vos caracteres, & sur tout en celuy
qui viura & mourra vostre seruiteur.

Mazarin. Ce n’est pas d’auiourd’huy que ie
vous suis si obligé : En reuanche, Monsieur,
vsez de mon pouuoir & de ma bourse, & me
eroyez, ie vous supplie, vostre tres-affectionné ;
mais il est iour, adieu Monsieur.

La Riuiere. Monsieur vostre seruiteur tres-humble,
seruez-vous bien tousiours de vos
characteres, & moy des miens ; adieu Monsieur,
iusques à ce matin, pour moi ie vais encore
dormir.

Mazarin. Pleust à Lucifer que ie peusse vous
imiter en cela, & estre en repos comme i’estois
il y a deux ans.

FIN.