LA RAILLIERE.

Il est vray que nous auons tous grande obligation
a ces deux illustres personnages, mais
il faudra faire du mieux que nous pourrons &
si nous ne pouuons rien faire sur le peuple
nous nous attaquerons au Clergé.

BONNEAV,

Il est vray que ces Messieurs sont encore
bien a leur aise, ils n’ont pas esté beaucoup
plumés.

CATELAN.

Machaut auoit desia formé vn party sur eux,
mais Monsieur d’Emery nostre ancien maistre
apres auoir receu de l’argent de luy, en receut
encore du Clergé : & supprima le party dont
Machaut n’a iamais rien eu.

LA RAILLIERE.

Il en a bien fait autant à d’autres, & nous nous
sommes bien retirez de ses griffes, plust a Dieu
que nous peussions aussi bien iouyr du Surintendant
d’apresent, il m’estonna bien il y a
quelque temps, quand il me voulut donner de
la cane sur les espaules, pour luy auoir voulu
dire que c’estoit nous qui auions entretenu le
Roy depuis sa minorité.

BONNEAV,

Il faut tascher de nous accoustumer à son
humeur le mieux que nous pourrons, encore
le malheur est qu’il ne se laisse point charmer
à l’argent.