Latine, Ciceron, dit tres-bien que la
paix est la chose la plus vtile & la plus agreable
que l’on puisse procurer à la Republique,
mais qu’il est quelquefois meilleur de
prolonger la guerre, que d’entendre à des
moyens d’accord, lors que ceux auec lesquels
on traitte, sont soupçonnez de peu de
foy. Suiuant la maxime de ce grand hõme,
le peu de seureté qu’il y auoit de traitter
auec celuy qui est l’autheur & la cause des
guerres, dont à son malheur la France est
depuis si long temps dechirée, nous estions
aux termes de les voir durer autant que sa
vie, si Dieu qui prend vn soin particulier de
cette Monarchie, & qui manie comme il
luy plaist les cœurs & les volontez des
hommes, ne les disposoit à nous en faire
voir la fin, & leuant les obstacles qui se sont
iusqu’icy opposez à la tranquillité publique,
nous faire jouir d’vne paix autant stable
& asseurée, qu’agreable & desirée de
tout le monde.

Personne n’ignore que Leurs Majestez
Britaniques ayant esté visiter le Roy & la
Reine à Corbeil, à leur retour ils donnerent
parole à Son Altesse Royale, à Monsieur le