d’aise te fait demander vne Cigogne armée de bec pour
deschirer tes semblables.

Encore si tu as le goust si depraué que tu ne vueilles
entendre à la paix, tu te deurois mettre sur le pied droit
pour donner des moyens, & vne instruction commode
pour la guerre, sans ainsi t’emporter ailleurs, & gauchir
à la calomnie. Saint Iean Chrisostome dit fort à propos
qu’elle est semblable à vne reuenderesse qui frequente
dans toutes les meilleures maisons d’vne ville,
& qui s’enquiert de toutes les nippes qui peuuent entretenir
sa chalandise : si quel qu’vn quelqu’vn luy parle de pierres
precieuses, elle luy promet de satisfaire sa curiosité ; à
vn autre des vaisselles d’or & d’argent, & à d’autres des
estoffes de moindres prix, enfin à chacun selon sa portée.
Ainsi la calomnie est tousiours aux escoutes pour
entendre ce qu’on dit d’vn chacun, afin d’en faire part à
ses suppots, & rendre contents tous ceux qui s’informeront
des mœurs, & de la condition des personnes. Si
l’on veut parler d’vn homme d’integrité, qu’elle n’ayme
pas, aussi tost elle ouure le paquet, & en dit plus
qu’on ne luy en demande ; & plus on a de merite, plus
aussi trouue-elle de moyen d’estaller sa marchandise.
Toy comme vn regratier de renommée, tu change les
anciennes couleurs de la vertu d’autruy, en de nouuelles
impostures, & escoutant ce qui se dit des plus renommés
tu profanes impunement les partages du Ciel, &
mets à l’encan la reputation des plus dignes. Ie te dirois
volontiers ce que Cimon disoit autrefois aux Atheniens,
pour chastier ton indiscretion, les gens de bien
n’ont garde de parler ainsi. Tu veux que le Parlement,
la ville de Paris, les Princes & Seigneurs qui l’ont protegée
reprennent les armes contre leur foy, & qu’ils
fassent la guerre à ceux qu’ils viennent de recognoistre
pour leurs souuerains, & pour leur amis, au lieu de te
ioindre à eux pour esleuer les mains & les yeux en haut,
en remerciments, & actions de grace du bien qui nous