ce bien-fait ; & comme les Atlantes qui seuls veulent
mal au Soleil, & haïssent sa lumiere, tu ose bien vomir
tes iniures contre les sages testes qui nous ont amené
le repos, quand tu escris que ce sont des ames venales &
corrompuës, qui ne recognoissent point d’autre regle de
la verité que leurs interests. Tu faits bien de ne point apporter
de fondements à ta calomnie, parce que tu n’en
peux trouuer aucun. Pour moy ie tiens qu’il en est de ton
mal comme de celuy des filles Milesiennes, qui estant entrées
en vne si estrange resuerie qu’elles se faisoient mourir
d’elles mesmes, sans qu’elles en eussent aucune cause
apparente, on ne peut rapporter cet excés qu’à vn empoisonnement
d’air, & vne punition diuine : de mesme
quand ie te vois tourmenté de l’enuie, & t’attacher toy
mesme sans suiet à cette croix, ie ne m’en puis imaginer
d’autre raison, qu’vne corruption de nature, & vne iuste
punition du Ciel qui a marié la peine à ton crime, pour en
tesmoigner l’horreur. Car apres tout, dequoy les blasme-tu,
& pourquoy leur reprocher que l’accommodement
qu’ils ont traicté n’est qu’vne pure trahison, & que le peuple
n’y rencontre que sa perte & sa totale confusion ? Ca,
responds-moy, qu’attendons-nous à leur retour d’vne negotiation
si importante, qui ne soit contenu dans les Articles
signés & verifiés, qui ne soit l’effet de nos souhaits
deuant la guerre, & la ioüissance des choses pour lesquelles
nous nous sommes armés ? Si nous demandions auec
vn empressement si raisonnable, la Reforme de tous les
abus qui se commettent dans les Finances, nous l’obtenons
a present puis que ces sangsues publiques qui en causoient
le desordre ne doiuent plus y prendre part. Si nous
recherchions par nos iustes plaintes, & nos frequẽts souspirs
le soulagement des Prouinces, nous en ressentons
desia les effets, par vne notable diminution des Tailles, &
la descharge effectiue d’vn grand nombre d’impositions.
Si nous poursuiuions instamment l’esloignement du premier
Ministre, i’en ay desia declaré le secret, mais ie puis

Page précédent(e)

Page suivant(e)