leurs excuses pour estre releué d’vn contrat.
Susanne vit périr devant soy ses faux dénonciateurs ;
l’Eglise marche auiourd’huy sur les ruines
des idolatres & des héretiques, qui l’ont persecutée
durant plusieurs siecles, & ces cruelles épreuves
n’ont fait que donner plus de lustre à sa sainteté.
Nourrissez-vous dans l’esperance que le
Ciel vous fera les mesmes faueurs pour la protection
de vostre honneur, & que Dieu qui a le
principal interrest en la deffence de la vertu, vengera
sa gloire contre les efforts de la Calomnie.

Cependant considerez l’incertitude du iugement
humain, que comme il s’est trompé en l’estime
qu’il a faite de vos actions, vous pouuez
mesme vous abuser en celle que vous formerez
des autres, parce que la veritable connoissance
des mérites d’vn chacun, est du ressort d’vne iustice
superieure ; quelle vanité donc de trauailler
auec tant de contention, pour acquerir vne gloire,
qui n’est à vray dire qu’vn iugement d’aueugle,
qu’vn fantosme pareil à ceux qui se forment
& qui perissent par vn petit vent dans les nuées :
quelle follie d’asseoir son bon-heur sur cét obiet
de l’opinion si peu solide qu’vn coup de langue le
peut renuerser ; & qui n’est iamais tellement en
nostre pouuoir, que l’ignorance ou la malice ne
le puisse rauir.

Au reste nous somme auiourd’huy reduits à ce