Or la Philosophie n’a point de vertus, la Religion
ne propose point de mysteres, que la malice
des hommes ne combatte par vne extrauagance
d’opinions, & par vn déreglement de vie : tous les
iours & de parolle & d’effet, l’on blaspheme contre
la sainteté des Autels, contre la bonté, la sagesse,
la toute puissance, l’amour, les felicitez de
Dieu, Hé ! comment seriez vous exempt de blasmes,
parmy ces bouches qui se portent contre le
Ciel, qui offencent les principes mesmes, d’où
vous tirez toute vostre recommendation. La
pluspart des Saints de l’ancien & nouueau Testament
ont eu cét exercice de patience, & les plus
innocens ont esté reduits à la condition des criminels,
comme vn Ioseph, vne Susanne, les Martyrs,
les Apostres, Iesus-Christ. Les premiers
Chrestiens estoient accusez d’homicides, de sortileges,
des mesmes abominatiõs qu’ils condamnoient
dans le Paganisme. Durant ces orages
Sainct Paul treuue vn déluge de consolations, sur
le témoignage de sa conscience qui se voyoit dãs
l’approbation de Dieu, & qui pour tous ces bruits
de peuple ne descendoit pas du thrône, d’où elle
les condamnoit de faux.

Le monde mesme qui est le createur de la calomnie
& qui de rien forme cét orage, dont il accable
la vertu, iuge de la malice des autres par la
sienne propre, il sçait fort bien que ces rumeurs