les diuisions, lors qu’elle iugeroit que la necessité
d’entendre a la Paix, pour ne pas entierement
paroistre attaché a la continuation de la Guerre,
m’auroit de beaucoup afoibly.

Il n’est point d’occasion ou ce double esprit de
la Cour, n’ayt sensiblement esclaté. Toutes les demandes
de la Paix, qu’on a si souuent reiteré, ont
esté constament eludees par ce mesme principe.
Les remonstrances que le Parlement a si souuent
fait iusqu’à se rendre importun, n’ont esté iamais
suiuies que de mille esperances imaginaire, dont la
Cour repaissoit cette illustre compagnie, pour se
renforcer en nous amusant ; Et quelques vigoureuses
poursuites que la France ayt poussé pour obtenir
la Paix, elle n’en a iamais remporté que des attentes
indecises, & des promesses qui n’auoit rien
de plus asseuré que leur dissimulation.

Apres ce qui en a paru dans Ville-neuf Sainct
George, ie pense qu’il n’en faut plus douter, & ceux
qui seront tant soit peu instruits des souplesses de
la Cour dans cette conioncture, ne douteront nullement
de l’auersion qu’elle a pour la Paix, a moins
qu’ils ne prennent plaisir de se laisser tromper par
les apparences, pendant quelles sont visiblement
dementies par les effets. Vous sçaués Messieurs de
Paris, quel estoit l’engagement de l’Armee ennemie
conduite par le Mareschal de Turenne, dans
ce poste : Vous sçauez la difficulté ou plustost l’impossibilité