dessein, pour se soustraire entierement de la Couronne
de France, & faire guerre ouuerte à Charlemagne, en
pratiquant les peuples de Guienne, pour en estre declaré
Duc par leur consentement, selon le droict qu’il
disoit luy appartenir. Le support de Carloman y pouuoit
beaucoup, mais la prudence & la vigueur de Charlemagne
y pouuoit dauantage. Car estant aduerty des desseins
de Hunault, & des menées secrettes de son frere,
il s’arma auec telle diligence, qu’il surprit les villes de
Poitiers, Xaintes & Angoulesme, & par leur moyen
tout le plat pays. Hunault qui contoit sans Charlemagne,
se trouuant méconté, s’enfuit en Gascongne chez
vn grand Seigneur du pays, nommé Loup, lequel il estimoit
estre, non seulement tres-confident à son party,
mais encor tres-fidel amy. Charlemagne enuoye incontinent
à Loup, pour le sommer de luy remettre entre les
mains Hunault, coupable de leze-Maiesté, cependant
qu’il fait dresser vn fort au milieu du pays. Loup obeït
& liure Hunault, auquel Charlemagne donna la vie,
auec la liberté & la iouïssance de tous ses biens : laissant
aux grands vn memorable exemple comme ils se doiuent
comporter dans les émeutes ciuiles, en preuoyant le
mal par prudence & diligence, & neantmoins ne desesperant
pas par la rigueur leurs sujets vaincus.

Mais qu’est-il besoin d’aller chercher des exemples si
loing ? nous en auons, Monseigneur, de plus ressents
& de plus conformes aux affaires presentes. En l’an
1541. les Rochelors s’estans mutinez contre quelques
Officiers du Roy, pour le fait de la Gabelle du sel, reconnurent
apres quelque temps leur faute, s’humilierent
enuers François I. Prince d’heureuse memoire, &
luy demanderent pardon. Ce bon Prince leur par donna
de tres-bon cœur, & leur fit vne remonstrance digne
d’estre escrite en lettres d’or, & grauée sur des tables de
Cedre. « Que leur faute veritablement estoit bien lourde,
& meritoit bien punition : mais que neantmoins