Saint-Julien,? [?] [1650], LE COVRRIER BVRLESQVE DE LA GVERRE DE PARIS, Enuoyé à Monseigneur le Prince de Condé, pour diuertir son Altesse durant sa prison. Ensemble tout ce qui se passa jusques au retour de Leurs Majestez. , françaisRéférence RIM : M0_814. Cote locale : A_9_9.
12. Ian.
Ce iour en leuant sa bequille Le Gouuerneur de la Bastille, Qu’on nõmoit Monsieur du Tremblay, Luy qui iamais n’auoit tremblé, Vieil Soldat & vieil Gentil-homme, A Monsieur d’Elbeuf qui le sonune De luy remettre ce Chasteau, Respondit tres bien & tres-beau Qu’il ne luy plaisoit de le rendre, Et qu’il pretendoit le deffendre. Mais il ne fut pas si méchant Que six canons dessus le champ Ne nous ouurirent cette place Sans auoir touché la surface ; Ce n’est pas qu’il ne fissent pouf, Que la Garnison ne dist ouf, Qu’elle ne parust sur la bréche, Qu’elle n’employast poudre & méche, Que maint coup ne fust entendu ; Mais c’est qu’il estoit deffendu Que dans ce beau siege de balle Aucun costé chargeast à balle Qu’il n’eust crié, Retirez-vous, Autant pour eux comme pour nous, Sur les mesmes peines qu’on donne Au meurtrier d’vne personne, Car quiconque eust fait autrement Auroit peché mortellement Tout autant qu’en vn homicide. Vn homme moins vaillant qu’Alcide, Mais certes plus homme d’honneur, Broussel, en fut fait Gouuerneur, Et son fils en cette occurence Fut pourueu de la Lieutenance.
Le Mercredy mis sur pied fut Le premier Regiment qu’on eut : Sur pied, non i’apperçoy que i’erre, Les pied, n’en touchoient point à terre ; Nos guerriers estoient sur cheuaux Prests à fuyr deuant les Royaux.
13. Ian.
Ce fut cette mesme iournée Qu’vne petite haquenée Apporta de nostre costé Alexandre ressuscité, Ce grand Beaufort dont la presence Nous rendit beaucoup d’asseurance, Ce Heros, ce fils de Henry, Ce braue, ce Prince aguerry, Iusques chez Renard redoutable, Ennemy juré de la table, Ce fameux fleau des Ierzais Quand ils causent comme des iais, Ce Mars qui bit, qui rompt, qui frappe, Et perce tout iusqu’à la nappe ; Ce Prince plus blond qu’vn bassin Et plus deuot qu’vn Capucin, Qui mit en rut toutes nos femmes Les honnestes & les infames, Baisa toûjours & rebaisa, Car iamais il ne refusa Ny Harangere ny Marchande, Ieune, vieille, laide, galande, Qui luy cryoit à qui plus fort Baisez-my Monsieur de Biaufort, L’vne tendoit vn vilain moufle, L’autre rendoit vn vilain soufle : L’vne est alloit ses cheueux blancs, L’autre ne montroit que trois dents, Dont l’ebenne estoit suffisante Pour en faire plus de cinquante, Il en baisa prés de trois cent, Toutes d’vn baiser innocent, Fors vne ieune femme grosse Qui descendit de son Carosse, Disant, mon fruict seroit marqué ; Car dans le baiser applicqué Au milieu de sa belle bouche, Il eut vn desir de sa couche, Et luy demanda rendez-vous, En la baisant deux autres coups ; Mais il fut depuis à confeste : Enfin ayant baisé sans cesse
Saint-Julien,? [?] [1650], LE COVRRIER BVRLESQVE DE LA GVERRE DE PARIS, Enuoyé à Monseigneur le Prince de Condé, pour diuertir son Altesse durant sa prison. Ensemble tout ce qui se passa jusques au retour de Leurs Majestez. , françaisRéférence RIM : M0_814. Cote locale : A_9_9. |