Saint-Julien,? [?] [1650], LE COVRRIER BVRLESQVE DE LA GVERRE DE PARIS, Enuoyé à Monseigneur le Prince de Condé, pour diuertir son Altesse durant sa prison. Ensemble tout ce qui se passa jusques au retour de Leurs Majestez. , françaisRéférence RIM : M0_814. Cote locale : A_9_9.
2. Mars
Ils reuinrent le trois de Mars Moins guais que deuãt des trois quarts, N’ayans pû tirer de la Reine Rien qu’vne mesure certaine De muids de bled reduis à cent Par chaque iour pour nostre argent, Dont seroit faite deliurance Moyennant que la conference Commençast dés le lendemain : Surquoy Messieurs amis du pain Conclurent qu’vne paix de verre Valloit mieux qu’vne forte guerre, Qu’vn souspir valoit moins qu’vn rot, Qu’vn casque valoit moins qu’vn pot, Vne brette qu’vne lardoire, Coup à donner que coup à boire, Et que le corps d’vn trespassé Valoit bien moins qu’vn pot cassé, Vn Cabaret mieux qu’vne garde, Vne plume qu’vne hallebarde, Mourir saoul, que mourir de faim, Voulans que dés le lendemain Nos Deputez fussent en voye.
3 Mars
Ce iour nous eusmes de la ioye D’apprendre qu’à la fin du temps Nos soldats faisoient battre aux chãps, Eux que pour leur long domicille On nommoit les Soldats de Ville. Voyons où s’addressa leurs pas, Ce fut où vous ne fustes pas. Ils camperent prés de la Seine En toute bourgade prochaine, Et se rasseurerent vn peu Ayant de l’eau contre le feu ; Auec vn pont sur la riuiere, Par où pardeuant par derriere De tous costez, à gauche à droit S’enfuïr quand l’ennemy viendroit : Pont que pour garantir d’embusche, Et d’estre bruslé comme busche, Bref pour le sauuer de tout tort Aux deux bouts ils firent vn fort.
Le Ieudy se borrifierent Et pour faire accord s’en allerent Le Premier President Mole Dont ie vous ay déja parlé, Monsieur le President de Mesme, Dont ie vous ay parlé de mesme, Les Nemonds & les le Cogneux Presidents au Mortiers tous deux, Deux Conseillers de la grãd Chambre Dont la vertu sent meilleur qu’ambre : Messieurs Longueil & Menardeau Pour qui ie veus faire vn Rondeau : Des Enquestes Monsieur la Nauue Homme de bien ou Dieu me sauue, Monsieur le Coq, Monsieur Bitau Monsieur Violle & Palluau : Monsieur le Febvre des Requestes : Briçonnet Maistre des Requestes : Ensuitte vn homme tres prudent Des Comptes premier President : Paris & l’Escuyer personnes Tres vertueuses & tres bonnes Des Aydes Monsieur Amelot Premier President fort deuot : Messieurs Bragelonne & Quatre-hõmes Qui pourtant ne font que deux hõmes Pour nostre ville & le dernier Vn Escheuin nommé Fournier : Qui tous à Ruël s’arresterent.
4 Mars
Où le lendemain arriuerent Monseigneur le Duc d’Orleans, Et Vous qui n’estiez pas ceans, C’est Vous Prince que i’apostrophe, Vous qui faisiez le Philosophe Et l’homme d’Estat dans Ruël, Vous qui traittiez de criminel Vn Corps qui sera vostre Iuge, (Disons plustost vostre refuge.) Prince auoüez nous à present Ce qui vous sembla mal-plaisant Auant vostre metamorphose, Que c’est vne agreable chose De n’estre point pris sans decret, Et que c’estoit là le secret Qui pouuoit sauuer vostre Altesse D’vne captiuité traistresse Dont on ne se peut garantir, Et qui vient sans nous aduertir. Vous voila tombé dans le piege : Qui l’eust dit que ce privilege
Saint-Julien,? [?] [1650], LE COVRRIER BVRLESQVE DE LA GVERRE DE PARIS, Enuoyé à Monseigneur le Prince de Condé, pour diuertir son Altesse durant sa prison. Ensemble tout ce qui se passa jusques au retour de Leurs Majestez. , françaisRéférence RIM : M0_814. Cote locale : A_9_9. |