Questier, Mathurin, dit Fort-Lys [1649], SVITTE DV IOVRNAL POETIQVE DE LA GVERRE PARISIENNE. Dedié aux Conseruateurs du Roy, des Loix, & de la Patrie. Par M. Q. dit FORT-LYS. VNZIESME SEPMAINE. , françaisRéférence RIM : M0_1763. Cote locale : C_4_38_11.
Tandis qu’on continuë les fortifications, A Ville Iuifue, nos gens font de belles actions. Ce grand Duc d’Elbeuf, du Camp de nostre armée Releue de Boüillon ; dont l’ardeur animée Fait paroistre par tout qu’il est le deffenseur De nos Parisiens ; & qu’à leur oppresseur Il sçait donner des loix & chastier la teste Qui cause en ce lieu cette rude tempeste. Et nos braues Bourgeois du Faux-bourg Sainct Germain, Pour faire l’exercice n’attendent au lendemain : Car le Dimanche mesme ils vont l’apresdinée, Ioyeux aux Prez-aux-Clers, place à ce destinée, Pour mieux se façonner aux aubades de Mars, Afin de ne trembler au milieu des hazards ; Et morguer l’ennemy du repos de la France, En foulant sous leurs pieds la superbe arrogance.
De les voir on prenoit vn grand contentement C’estoient tous hommes faits qui marchoient lestement, Au nombre de six mille & plus, dont le visage Monstroient appertement qu’ils auoient du courage, Et qu’ils auoient enuie d’acquerir des Lauriers, En ne voulant ceder aux plus hardis Guerriers ; Ce grand Duc de Beau-fort les vid à son plaisir, Et la Mothe Houdancourt contenta son desir, En voyant nos Bourgeois d’vne façon gentille, Zelez & preparez pour defendre la Ville, En cas que l’ennemy voulust faire vn party, Ce Camp estoit pour eux assez bien assorty : Car il n’y manquoit rien ; & chacun sous ces armes Ne faisoit que trop voir qu’ils estoient bons Gensd’armes.
Questier, Mathurin, dit Fort-Lys [1649], SVITTE DV IOVRNAL POETIQVE DE LA GVERRE PARISIENNE. Dedié aux Conseruateurs du Roy, des Loix, & de la Patrie. Par M. Q. dit FORT-LYS. VNZIESME SEPMAINE. , françaisRéférence RIM : M0_1763. Cote locale : C_4_38_11. |