d’vn ambitieux qui le gouuerne, & qui l’a enleué de
son lict, à mesme temps que le C. M. son veritable
Maistre rauissoit vn Roy enfant. Qu’il songe au nom
de Dieu qu’il est vn Soleil dans l’Estat, qui doit sa
lumiere & ses biens faits également à tous les François,
& qu’il lui sera reproché qu’il aura vtilement
employé tous ses rayons à purifier des bourbiers &
des marets pleins de venin & d’ordure L’on le comparera
à cette figure de Iupiter, qu’Homere nous
represente endormy au mont Ida par l’artifice de
Iunon, sur vne couche de lotos, de saffran & d’hyacinthe ;
afin que pendant ce sommeil les Troyens
fussent priuez de son assistance contre les Grecs. S’il
ne se réveille bien tost, il se trouuera dans vn embrasement
qu’il ne pourra plus esteindre, & dont les
cendres cacheront le feu d’vne haine vniuerselle
dans le cœur de tous les François.

Les peuples qui ne sont point soulagez ny protegez,
perdent insensiblement le respect & l’amour
qu’ils doiuent à la maison de leurs Princes Dieu l’a
permis dans celle mesme de Salomon. Roboam son
fils gouuerné par vn mauuais conseil, respondit imprudemment
à la iuste requeste de ses Sujets, qu’au
lieu de les soulager, il appesantiroit leur ioug, que
loin de les fouetter de verges communes cõme son
pere, il y ioindroit les chaisnes & les aiguillons. La
Sainte Escriture remarque en termes expres, qu’il
ne fit cette rude & cruelle réponce, que parce qu’il