& à l’autre qu’ils ont oüy asseurer ce que nul n’a pensé
que des gens de leur calibre, infames banquiers de malefice,
vous trouuerez peut estre le mot pour rire à la fin
de vostre commerce, engeance d’iniquité, pommes de
discorde, faisons partie ensemble de nous moquer du
passé & voüer à l’aduenir des mouuemens plus reguliers
pour nostre conduitte, il est temps de changer d’habitude,
vostre vie est lassante & la mien ne inutile, ie cours le
monde pour apprendre, & vous pour le troubler, si ie
vielles sans rien sçauoir ou que ma science me serue peu,
vostre sotte manie ne vous sçauroit produire que des peines
honteuses, en toutes choses l’intention honore l’œuure,
vous estes blasmable en tout poinct. Et ie vous annonce
ou quelque mort sinistre ou vne vie tres-miserable,
ceux qui font semblant de vous escouter auec plaisir,
redoubteront vos satyres, le nom d’amy vous doit
estre odieux, puis que toute la terre croit que vous en sacrifieriez
dix mille à la complaisance de quelque mot
bien receu ; enfin camarade sans amitié, ie suis d’auis de
deuenir plus sages, de nous attacher à l’aduenir à l’examen
de ce qui nous peut estre aduantageux, honorer les
grands sans interest, ne nous engager dans la flaterie ny
la satyre, parler plustost du Chasteau enchanté & du rauissement
d’Helene que des Palais de nos Princes, & des
gestes des anciens Heros que des deffauts de nos voisins,
& si nous voulons rire du general, que ce soit tousiours
auec ceste modestie de ny comprendre iamais le particulier,
obseruer toutés les respectueuses deferences de
la sagesse, & nous tirons des broüillons mal appris qui
s’exposent sans cesse à la crainte de la punition & à la
honte d’vn infame & detestable reproche.