Majestez qui est Dieu seul Roy souuerain de l’Vniuers. C’est
la parole que Daniel porte au Roy des Babyloniens, cotté au
commencement de ce discours. Ils sont Rois & Superieurs à
l’esgard des hommes, mais ils sont sujets à la Toute-puissance
de Dieu, & à sa volonté Prou. 21. v. i. Le cœur du Roy est ainsi en
la main du Seigneur, comme sont les diuisions des eaues, partout la où
il voudra, il l’enclinera. Saül est aduerty par Samuël suscité par
vne femme deuineresse I. Reg. 28. que le Seigneur s’estoit retiré
de luy, & qu’il n’entreprenne point de batailler contre les Philisthins.
Neanmoins il ne laisse point de batailler, mais il est vaincu
& tué ch. 31. Dauid au contraire, demande au Seigneur, 2.
Reg. 2. V. I. S’il montera en l’vne des citez de Iuda, & le Seigneur luy
dit, mante. Ainsi Dieu encline le cœur des Rois pour les mener
à la fin qu’il a decreté, l’vn pour perir, mal-heureusement, comme
Saül, & l’autre pour regner heureusement comme Dauid.
C’est pourquoy S. Paul escriuant aux Rom. chap. 13. v. 6. dit,
Pour cette cause aussi vous payez les tributs, car ils sont Ministres de
Dieu. Que si les Rois se méconnoissent, & que de demy Dieux,
ils veulent estre esleuez comme Dieu mesme pour estre adorez,
le Ciel change de face, & les precipite de leur throsne à
cause de leur orgueil.

Nabuchodonosor fit faire sa Statuë & la fit adorer Dan. 3.
V. I. mais la Couronne de l’Empire des Babyloniens, luy fut iustement
ostée, comme il est rapporté au chap. 4. V. 16. C’est le
malheur des peuples, lors que les Rois abusent de leur authorité,
& qu’ils se rendent odieux à Dieu, & aux hommes,
d’autant que quand Dieu transfere les Royaumes â des nouueaux
Seigneurs, ce n’est point sans grands & horribles troubles
en l’Estat. Comme donc il n’y a que Dieu, à qui le Roy est
sujet, il n’y a que luy, à qui il doit obeyr, receuoir & suiure ses
Loix & Ordonnances & non des peuples, qui luy sont sujets.
Autrement comme c’est Dieu qui constituë les Rois, c’est luy
aussi qui les destitue, & priue de leur Estat quand ils transgressent
ses loys. C’est pourquoy Samuel à beau lamenter Saul
1. Reg. 16. L’Arrest estoit rendu de Dieu, qu’il luy osteroit son
Royaume, puis qu’il auoit méprisé ses ordres, Le Seigneur dit à
Samuël iusques à quant lamente tu Saul, veu que i’ay reprouué, qu’il ne
regne sur Israël. Dieu n’est point accepteur de personnes Act. 10.
v. 34. Il prefere vn simple Berger fils d’Isaï nommé Dauid à la
riche taille de Saül, emply, dit-il à Samuël, ton cornet d’huile au