ARREST
SVR LE IVGEMENT RENDV,
contre l’Autheur de la Verité toute nuë, &
l’Aduocat General, parties Aduerses.
LE Prophete Daniel parle ainsi à Nabuchodonosor Empereur
des Babyloniens, chap. 2. v. 37. Tues le Roy des Rois,
& le Dieu du Ciel t’a donné le Royaume, la force, & l’Empire,
& la gloire v. 38. Tout où habitent les enfans des hommes, & les bestes
du champ, & aussi a donné en ta main les oiseaux du Ciel, & constitué
toutes choses sous ta puissance. Pourquoy donc annoncer si hardiment
que les Rois sont establis des hommes ? Tous les hommes
ne sont point esgaux : Les dons de nature, c’est à dire de
Dieu, sont distribuez fort inegalement. Ie veux que tous les
hommes particuliers ayent part egale en la difference qui constituë
l’homme essentiellement Mais ie n’entends point que les
mesmes particuliers n’aient leurs differences, qui les rend fort
inesgaux, non seulement à cause d’vn plus ou moins iuste temperament
des organes de nos sens ; Car il s’ensuiuroit que si les
organes des brutes estoient ainsi bien disposez, ils pouroient
auoir plus ou moins de connoissance, voir mesme à l’esgal des
hommes-Surquoy, comme sur vn fondement certain, les diuerses
conditions des hommes sont appuyées. De façon, que comme
és choses celestes, certains signes sont pour commander, &
les autres pour obeyr, ainsi en est-il des hommes. D’autant que
celuy qui est n’ay sous vne partie du signe, qui commande, &
vn autre sous la partie, qui correspond au signe sujet de sa nature,
aura la puissance & la dignité de commander sur l’autre, &
aura la naturelle inclination de se soumettre à ses loix. C’est l’ordre
que Dieu a estably au Ciel, & en suitte sur la terre, qu’il
faut suiure.
Pour quelle raison donc exposer la dignité du Prince au choix
& à la disposition des peuples, qui sont pour obeyr, & non pour
commander, qui doiuent demander leur Prince au souuerain, &
le receuoir de luy, & non le choisir selon leur caprice ? Ce que
Dieu fait & accorde en celuy qu’il a doüé de la dignité Royale
pour bien gouuerner ses peuples. Salomon en ses Prou. ch. 8. v.
15. parle ainsi : Les Rois regnent par moy, & ceux qui ordonnent les loix
parmoy discernent iustes, & v. 16. les Princes dominent par moy, & les
puissances discernent de la Iustice. Quoy ? veut-on donc que les Rois
M. B. I. V. D. R. D. L. P. P. T. [1652],
ARREST SVR LE IVGEMENT rendu contre l’Autheur DE LA VERITÉ TOVTE NVE, ET L’AVOCAT GENERAL parties Aduerses. , français
Référence RIM : Mx. Cote locale : B_17_16.