Voila comme cét insolent satiriste offence
adroitement la Reyne, comme il fait voir la malice
de cette Princesse, par vne impuissance affectée
qu’il luy donne de n’auoir iamais peu acheuer
le Val de Grace ; quoy qu’il fasse, cependant
fort clairement entendre, qu’il n’a tenu qu’à elle,
puis que toutes les richesses de l’Estat ont esté englouties
auec son adueu, par l’auidité de son fauory.

Passons à S. A. R. pour voir le peu de respect
auec lequel ce calomniateur effronté traite malicieusement,
quoy qu’auec des termes couuerts, le
plus genereux Prince du monde. Il s’imagine bien
qu’il le met à labry de sa calomnie, en disant que
c’est auec vne extreme repugnance que S. A. R. signa
l’Vnion de Monsieur le Prince lors que le Cardinal
Mazarin fut entré dans l’Estat, si c’est auec vne extreme
repugnance que S. A, R. signa l’Vnion auec
Monsieur le Prince, c’est donc auec vne plus parfaite
connoissaice du mal qu’il alloit faire ; Car enfin
il n’est point d’homme de sens qui ne tombe
d’accord auec moy, que cette resistance interieure
qui s’oppose à l’execution de nos desseins, est vne
marque euidente de l’iniustice que nous y connoissons ;
& qu’il n’est pas possible que nous soufrions
cette contradiction dans nous mesmes,
lors que ce que nous allons entreprendre, ne nous
paroist estre nullement contraire aux Loix du deuoir.