mais aussi dans vostre Maison, où plusieurs de ses suiuans & de
ses gardes paroissent armez ; ce qui n’auoit iamais esté souffert.

Nous auons encore remarqué ce qu’il a dit dans ses lettres, que
quatre ou cinq mil hommes, qui l’ont escorté estoient ses amis, & ses
troupes : d’où s’ensuit que vostre Majesté est en toutes façons és
mains des Estrangers, comme il est tres-certain, que s’estant rendu
dispensateur des Charges militaires, & de toutes les Charges, qui ne
sont conferees & distribuees qu’à ceux qui veulent dependre de luy,
leur creance est, qu’ils ont toute l’obligation à celuy qui vous despoüille
pour les reuestir, & refuse ceux qui ne veulent pas estre ses
Partisans.

SIRE, nous croyons qu’en cette rencontre il est loisible de nous
seruir de toutes voyes legitimes pour garantir vostre Personne des
entreprises sur vostre authorité, & vos Subjets d’oppression : nous
sommes assurez que vostre Majesté ne veut pas ruiner son Royaume,
pour contenter vn Estranger, qui n a rien de recommandable que sa
qualité de Cardinal, laquelle estant en lui vn present de la fortune &
non pas vne recompense de la vertu, est vn ornement des-honoré
par celuy qui en est reuestu.

Cette dignité qu’il n’a iamais meritée, ne le peut exempter de la Iustice
souueraine que Nous administrons par la puissance que nous tenons
de Vostre Majesté : nous la deuons faire sentir à celuy qui s’est
voulu mesler de vos affaires, & qui s’est engagé par vne consequence
necessaire à rendre compte de sa conduite aux Iuges establis pour
ordonner la punition à tous ceux, qui abuseront de vostre authorité,
troubleront le repos de vostre Royaume, & violeront les loix, ausquelles
ils se sont soûmis.

Nous auons remarqué vn autre deffaut, qui doit exclure le Cardinal
Mazarin de vos Conseils pour la legereté qui paroist en ses
resolutions, & qu’il pourroit imprimer dans vostre ame les mesmes
maximes qu’il a tenuës dans la dispensation des biens faits, & dans
le choix qu’il a fait des personnes de toutes conditions, qu’il a aduancées
au preiudice de ceux qui le meritent, & sont plus capables
de vous seruir.

Nous auons aussi grand sujet de nous defier, que le Cardinal
Mazarin ayant pris creance dans l’esprit de vostre Majesté n’entreprenne
de luy communiquer ses passions pour le porter à poursuiure
ses vengeances. Nous n’ignorons pas que la coustume de ceux,
qui ont acquis vn grand credit auprés des Princes, est de leur persuader
que les déplaisirs, qui leur sont faits, sont des entreprises sur l’authorité