repose. Au moins la douleur sensible témoignera
respectueusement à sa Majesté (qui est le
plus grand Monarque de l’Europe) les moyens de
regner absolument dans les cœurs, & les pays de
son obeïssance, Estant doüée d’vn iugement solide,
& ioint à l’amour de son pauvre peuple, elle trouvera
bon qu’on lui fasse conserver ses finances pour
les necessitez vrgentes de son Royaume, & voir
les desordres qui s’y cõmettent sous son nom. Veux
tu estre guery, disoit la Philosophie à Boëce (qui étoit
lors le plus riche & parfait ornement du Senat
Romain) descouvres-moy ton mal. Puis qu’en
qualité de Chrestien vous cherissez la Vertu &
fuyez le Vice, vous aurez en souveraine execration
ces sang-suës de l’Estat, & croyez asseurement
que le mesme Demophile n’a attandu de cét
œuvre autre recõpence & action de graces sinõ que
vous en fassiez profit. C’est dequoy ie iurerois sur
les Autels ; vous prierez cependant s’il vous plaist
le Soleil de Iustice, qu’il illumine si clairement &
vivement les amateurs du commun salut, qu’ils
monstrent auec quel zele ils sont portez pour le
service de sa Majesté, & le soulagement de ses
subjets. Car le plus docte & sage des Monarques
m’apprend que la dignité du Roy sera en la multitude
du peuple, comme au rebours la honte au
petit nombre.) Adieu.