dans eux mesmes, ils apprendroient qu’ils sont pestris
de l’argille d’Adam, & que la pluspart d’entr’eux sont
d’vne fort basse & obscure naissance, ayãs au reste pour
patron le Thresorier du College Apostolique : car ce
larron-traistre, ou traistre-larron, voloit tousiours
quelque chose de ce sacré depost que Nostre Seigneur
luy avoit mis confidemment entre les mains. Aussi
iront-ils avec luy en ce lieu tenebreux où il y a pleurs
& grincemens de dents : & il m’a esté asseure par gens
d’authorité, dignes de creance, & qui ont beaucoup
de credit en l’autre monde, qu’vn Partisan voulut
dernierement forcer les portes de Paradis (comme
tels gens sont insolens, choleres, prompts, & veulent
tout emporter de haute lutte), mais Monsieur S.
Pierre qui la gardoit luy bailla vn si grand coup de ses
clefs sur la teste qu’il le blessa griefvement, & pour
cette blessure il se retira en haste grondant de despit,
& sur la retraite il fut grippé par cinq ou six Diables,
qui en firent vne gorge chaude, les estimans leurs plus
frians, & delicats morceaux pour estre gros, & gras
de la substance d’vn chacun. Au demeurant si vous
desirez sçavoir quels sont leurs vestemens apres avoir
descrit leurs corps, leurs ames, & leurs esprits) vous
sçaurez qu’ils se vestent d’habits plus mouchetez que
la peau d’vn tygre. Ce qui represente les differens personnages
qu’ils ioüent en la societé civile pour s’enrichir.
Ie leurs en ay veu ioüer de toutes sortes, mais
ils avoient grand’peine à contrefaire celuy d’vn homme
de bien, qui estoit, & est encore parmy eux, presque
aussi rare qu’vn Phœnix, & Diogene le fallot avec

Page précédent(e)

Page suivant(e)