vne heure toutes ses conquestes, & demeura prisonnier. Le Roy outré de
cet affront, y renuoya l’Admiral Bonniuet, qui prit Fontarabie, sans faire
autre exploict. Charles le Quint, à son retour d’Allemagne, assiegea ceste
place, & la prit, par la lascheté du Gouuerneur nommé Franger, qui
en fut disgracie, & declaré roturier.

Reste à examiner les raisons sur lesquelles les Espagnols fondent leur
iniuste possession. Leurs Historiens en touchent deux principales. L’vne
est, l’excommunication de Iean d’Albret, & le pouuoir donné par le Pape
Iules d’enuahir son Estat. L’autre est, le refus qu’il fit aux troupes Espagnoles
de leur donner passage par ses terres.

Pour la premiere raison, Ie dis que l’excommunication du Pape Iules
est vn pretexte, duquel les Espagnols se seruent contre leur conscience,
n’ignorans pas que la puissance Ecclesiastique ne s’estend pas iusques là
que de pouuoir deposer les Roys, qui ne releuent que de Dieu. Que s’il arriuoit
quelque differend entre le S. Siege & les Roys d’Espagne, qui portast
les Papes à les excommunier, & mettre leur Estat en interdit, ils se
garderoient bien d’ouurir leurs portes à ceux qui les voudroient enuahir auec
ce tiltre. C’est pourquoy l’interdit du Pape Iules, & tout ce qui s’en est
ensuiuy, n’a aucun fondement en raison, suiuant mesme la determination
du Concile de l’Eglise Gallicane, que le Roy Louis fit assembler à ceste
fin : & les oppositions qu’on a fait de tout temps aux Papes, quand ils ont
voulu desployer le glaiue spirituel à la ruine des Estats & Principautez.

Pour la seconde raison, Ie dis que Iean d’Albret, comme vassal de ceste
Couronne, n’estoit pas seulement obligé de fermer la porte à ses ennemis,
mais aussi de les repousser par la force. Et d’ailleurs, si les Princes sont
tenus de fauoriser les iustes querelles, & se roidir contre la violence des oppresseurs ;
Qui est-ce qui blasmera Iean d’Albret de s’estre opposé aux efforts
d’vn Prince qui auoit tant de fois abusé de la foy publique, & frustré
doleusement nos Roys de leurs droicts. C’est pourquoy tant plus les Espagnols
alleguent de raisons pour fortifier ceste cause, plus ils en descouurent
l’iniustice : & quelque couleur qu’ils luy donnent, ils ne sçauroient
effacer les marques d’ambition & de conuoitise qui paroissent sur le front
d’vne entreprise si inique.

Voila, SIRE, en peu de lignes l’Histoire des Vsurpations de la Maison
d’Austriche, auec lesquelles elle s’est acquis vn pouuoir si redoutable,
que si vostre pere, ce grand Monarque, n’eust paru au plus fort de nos ciuiles
bourasques, comme vn feu sacré, durant la tempeste, toute l’Europe
ne seroit plus qu’vne grande Monarchie, que la Couronne d’Espagne
couuriroit de son ombre.