l’image du Paradis, ainsi que la des-vnion est celle
de l’Enfer.

C’est ce qu’à fort iudicieusement remarqué ce
grand Monarque & Roy tres-Catholique, la conduite
aussi bien que la sagesse, duquel ne se peuuent
trop admirer ; car il est à preiuger que ce debonnaire
Prince n’est point autheur de la guerre,
veu qu’il n’a plus forte passion que de s’vnir à la
France par vne bonne pacification, qui est dans le
cœur de ses subjets, aussi bien que le regret d’auoir
demeuré si long temps parmy des troubles qui ont
tout rauagé, & qui n’ont donné aucun repos aux
consciences, si ce n’est en celle de Mazarin & de ses
complices, qui y ont trouué leur satisfaction ; ce
cruel a empesché la Paix, par ses astuces & inuentions
Italiennes & criminelles.

Il a allumé le flambeau de la guerre par tout les
Royaumes ; & ses plus chers delices n’ont esté que
d’extorquer les biens, en des-vnissant toutes les
plus fortes amitiez ; mesme son insolence & temerité
extreme, n’ont épargné les testes couronnées
qu’il a couuertes d’épines tres piquantes, par la
perte & ruïne de leurs Estats.

Ce pieux Monarque & tres-Catholique Prince,
proteste que ce funeste Iberien, est vn proditeur
& vn faussaire, qui a suscité par ses malefices des
seditions, & qui a diuerses fois fait rupture des
traittez de Paix ; & que si sa Majesté a vsé de ses
forces Royales, n’a esté que pour maintenir son
Estat, & l’appuyer contre la tyrannie Mazarine :