Quoy ! la Normandie seruiroit de prison à son
Roy ? elle qui a versé tant de sang pour son
seruice ; ô Ciel ! ô Dieu immortel ! destournez
ce nuage, elle est preste de s’exposer la
teste baissée pour le deliurer de ces mains impures
& profanes : Et pour cét effet toute la
Noblesse s’en va au deuant, pour obliger cét
ennemy d’Estat à nous rendre ce que nous
auons de plus precieux ; Ouy, Sire : ce peuple
se va ioindre auec celuy de Paris, qui met
dans ses drapeaux, REGEM QVERIMVS,
pour le restablir, le conseruer & l’honorer ; &
nous autres, QVÆRIMVS MAZARINVM,
pour le mettre en fuite le detrosner &
le perdre pour tousiours.

Vn malade gissant dans le lit de la mort,
doit faire tout ce qu’il peut pour sortir hors de
sõ mal & si haut & puissant qu’il sçauroit estre
en condition & qualité, il est obligé pour le
bien de sa santé de croire en son Medecin &
luy obeyr en quelque façon, puisque c’est luy
qui ordonne & qui commande ; Vostre Estat,
Sire, est dans l’infirmité de la mort, & ce grand
Corps mistique composé de differentes humeurs,
agité de differends mouuements, est