Ce Roy si peu digne de l’estre
Que rauy d’vn rebec champestre,
Il le prefere au violon
Raclé par messire Apollon,
Oyroit icy d’autres merueilles,
Guay d’estre asne par les oreilles,
Et riroit de son chastiment
Aupres d’vn vielleur si charmant.
Trouuez-moy vielleur dans l’histoire,
Suiuy de plus belle auditoire,
Il tient par l’oreille attaché
Bestail acquis à bon marché,
Plus que cent nobles de village
N’en ont en cent ans de mesnage.
Prés d’vn gros bourg de ces quarties,
Que ie nommerois volontiers
Du celebre nom de Mandosse,
Puis qu’alors il s’y faisoit noce ;
Des pitaux pour s’ébattre aux champs,
Dans leurs ieux & rustiques chants,
S’estant saisis d’vne espousée,
L’y menoient la courante aisée,
Où sa iaquette à brinballer
Mettoit son bas d’estame à l’air.
Eux attirez dans l’abondance
Des bestes qui vont à la dance :
Orphée entraisne ces pitaux,
De leur nature assez brutaux

Page précédent(e)

Page suivant(e)