Tous brutes, priuez & sauuuages,
Quitent niches, trous, pasturages,
Se sentant chatoüiller de loin
L’oreille d’vn plaisant tintoin ;
Argus qui court apres sa vache
Qu’il laissoit paistre sans attache,
Pris par l’oüye aimeroit mieux
Quatre oreilles que ses cent yeux :
Il n’est pas iusques à la taupe
Qui sort de son trou noire & gaupe,
Et saute aueuglette chantant,
Qui ne voit ce vielleur l’entend.
La bestialle compagnie
Desia trepigne à l’armonie,
Plus ils s’y viennent amorcer
Et mieux les fait elles dancer ;
Si le sonneur m’eust voulu croire
De les faire dancer en foire,
Il auroit plus gaigné de sous
Qu’Auberuilliers ne vend de chous.
Ce bouffon de foire qui trolle,
Son chien preste à joüer son rolle,
Perdroit son honneur & son chien
Aupres du sçauant musicien,
Qui sans leçon instruit ces bestes
A friser de culs & de testes,
Le singe ny l’escurieux
Ne s’y tient sur le serieux,

Page précédent(e)

Page suivant(e)