n’ont aucune puissance sur l’ame, mais craignez celuy
qui apres ceste vie, peut enuoyer le corps & l’ame,
au feu d’enfer.

Ie cognois toutes fois que la resistence que l’on doit
faire au mauuais Princes estably de Dieu, ne doit pas
estre iniurieuse, mais tres-honnorable & graue : &
entens qu’en se deffendent des iniustices des mauuais
Princes, le subiect doit seulement parer aux coups, &
en refusant d’obeyr à son commandement iniuste &
meschant, & disant franchement la verité, le subiect
ne doit iamais oublier la reuerence qu’il doit à son
Prince : ains le doit combattre de raison & de Remonstrances
pleines d’honneur, & se rapporter à
Dieu de la vengeance, qu’il a accoustumé de prendre
des mauuais Princes : desquels il se deffait souuent
tres soudainement & par des moyens infirmes & admirables.
Le Prince est l’image de Dieu sur la terre,
representent aucunefois sa bonté, sa douceur, & misericorde :
autre fois representent sa rigueur & iustice
quand il est tyran : il sert à Dieu de vengeance & punition,
dont il chastie son peuple : & souuent (en ceste
intention) Dieu donne des mauuais Rois, ou bien il
change leur cœur comme il luy plaist. C’est ce qu’il
dit à son peuple par le Prophete, le vous donneray
dit il vn Roy en ma fureur. Et ailleurs il est dit, que
Dieu fera regner l’hypocrite pour les pechez du peuple.
Le sage dit que le cœur du Roy est en la main de
Dieu, & qu’il le façonne & conuertit comme il luy
plaist.

Voyla (SIRE) la doctrine que tiennent les Catholiques
vos bons & fideles subiects, & laquelle ie
m’asseure que vous tenez auec eux, comme Prince
tres-Catholiques, & pour ceste raison i’estime que
vous prendrez de bonne part, les remonstrances contenues
en ce cahier, & qu’entre l’aspreté des espines
qui y rencontrerez, vous y sçaurez recueillir des