ledit payement de rentes & gages, sur vos deniers
ordinaires & extraordinaires, qui fait que n’y pouuez
fournir, & prenant par vous, comme il se fait ordinairement
le fonds ordonné pour lesdits gages &
rentes, au lieu de contenir par crainte vos sujets,
vous les ruynez & mescontentez, sans vous auoir aucunement
offencé.

Ce sera bien rentrer de fievre en chaud mal, lors
que t’elle chose aduiendra. Car depuis que des sujets
entrent en ce desespoir, ils ont tousiours en leur
cœur & pensée le commun Prouerbe, qu’il faut vaincre
ou mourir : & que le seul salut des vaincus, est
de n’esperer aucun salut.

Que si l’on dit que vous estes riche & puissant
d’hommes & d’argent pour y resister : & que vous
leur feriez la guerre de leur propre bien, qu’elle apparence
y a-il que vous le puissiez faire parmy tant de
diuisions, & ayant offencé & ruyné tant de gens ?
Car les hommes que vous deuriez auoir pour vostre
defence, seront alors bandez contre vous. Dequoy
payez-vous à present les gaiges & rentes de vos Officiers
& sujets ? N’est ce pas des tailles, aydes, subsides
& impositions qui se leuent sur vostre peuple ? Quelles
tailles leuerez-vous alors sur vn peuple ruiné, desesperé
& reuolté ? Quelles aydes & impositions leuerez-vous
en si peu de villes, qui vous resteront desertes ?
Iugez vous mesmes que vous serez alors pauure
& miserable, & ne sçaurez, comme l’on dit, de quel
bois faire fleches.

Hé bon Dieu comment se peut-il faire, SIRE,
qu’ayant l’entendement ainsi bon que l’on dit, vous
ne cognoissez point le danger où vous estes ? & ne reprouuez
ce vilain conseil, & ne chastiez ceux qui
vous le donnent, & conseillent d’ainsi mal traicter
vos bons sujets ?

Ces trompeurs & traistres conseillers sont neantmoins