de la premiere, quoy que neantmoins elle
n’ait auec elle qu’vne certaine alliance d’interest
qui les fera paroistre dissemblables en leur fin : c’est
la trop grande abondance de biens qui se trouue
auiourd’huy dans les gens d’Eglise, & que ie pretends
faire passer pour vne des plus fecondes causes
de desordres, qui sont dans cette Monatchie.
Ie ne doute pas que les Ecclesiastiques vertueux
ne tombent d’accord auec moy de la verité de ce
sentiment, mais ie me resous aussi d’estre exposé
à la censure des vicieux, qui ne manqueront pas
de me traiter d’ignorant, par ce qu’ils iugeront
que ie les choque dans la plus ardente de leurs
ambitions, & que ie les veux despouiller de tous
leurs tresors pour les donner à discretion à toute
sorte de monde.

La premiere raison dont ie pretends apuyer
cette verité, m’est fournie par la supposition
que i’ay desia fait, que la Religion doit estre la
base & le fondement, de la bonté du gouuernement
Politique : tellement que ie conclus
de là que la Religion, ne pouuant subsister
dans sa vigueur, que par le moyen des gens
d’Eglise qui en sont comme les œconomes, il
faut donc necessairement que les Ecclesiastiques
se tiennent dans leur deuoir, afin de n’estre
pas les causes de sa decadence, par la mauuaise