III. Ie veux faire passer l’impunité des crimes
pour la troisiesme cause des desordres de cét
Estat : & cela mesme auec tant de raison, que
l’Escriture sainte fait foy, qu’en punition d’vne
soule impunité Dieu chastia bien rigoureusement
autrefois toute la Tribu de Benjamain,
comme nous lisons dans l’Histoire de Lacedemone,
que les Dieux ne permirent iadis la sanglante
defaite de la iournee de Leuctre, qu’en
vengeance de l’impunité d’vn malicieux homicide
que la passion auoit fait commettre au general
de Sparte auant la bataille.

Si ie voulois prendre la source des troubles de
l’Estat dans l’impunité des crimes qui se commettent
par les particuliers, il ne faudroit plus
s’estonner que de voir si peu de desolation dans
la France, apres auoir esté les tesmoins des sacrileges,
des Sodomies, des viollemens, & des brutalitez
qui s’y sont commises, sans que la vengeance
s’en soit iamais ensuiuie : mais ie ne veux
toucher que l’impunite des crimes qui se commettent
par les personnes publiques, & qui sont
pour parler auec S. Chrisostome, les estendars
du vice, le arcenals du diable, & les phares de
l’impieté.

Est il de plus grande impunité que de permettre
qu’vn Ministre mette le feu aux quatre coins