pouuant se resoudre de faire soliciter la condamnation
de Monsieur de Thou, comme il
en estoit requis par nostre homme auec beaucoup
de chaleur, il en fit vn cas de conscience
lequel fut traitté & decidé en vne assemblée ou
ils assisterent & où nostre homme presida. Et
il y fut resolu que le Cardinal deuoit en cette
action se considerer non point comme particulier :
mais comme Ministre d’Estat necessaire,
& à la vie duquel le repos public estoit attaché.
Et que Monsieur de Thou estant chargé
d’vne accusation capitale, & ennemy declaré
du Ministre : Ce Ministre estoit obligé pour le
bien de l’Estat de faire solliciter les Iuges de le
iuger selon la seuerité des Loix.

Mais quand bien ces tesmoignages manqueroient,
il ne sçauroit estouffer le continuel
reproche que sa conscience luy fait, ny éuiter
la punition qui luy arriuera de cette cruelle &
maudite preuarication par luy faite contre la
Iustice & l’honneur de son caractere.

La prodigieuses dissipation qui a esté faite
des Finances pendant la Minorité du Roy, est
le principal atticle des plaintes que tous les
peuples du Royaume font auiourd’huy contre
le gouuernement de la Regence : mais à quel
autre qu’à luy, peut-on plus legitimement en
demander raison, puis qu’il est tres certain