Ce Courier m’ayant apris ce reiglement continua
de la sorte, & me dit qu’il y a enuiron huict iours que
ce mesme reglement auoir causé vn grand bruit au
Royaume de Pluton, & voicy comme cela arriua.

La sentinelle des corps de garde aduancé voyant
venir de loing vn homme habillé en Cardinal cria incontinant
le qui va la, demeure, ce Cardinal fut
estonné à ce bruit, car il pensoit entrer en ce Royaume
là comme en l’Eglise en prenant de l’eau beniste,
mais il fut bien trompé quand il ouyt cette sentinelle
appeller le Caporal hors de la garde, en criant derechef
vn demeure, auec tant d’espouuante qu’il sembloit
que cette pauure sentinelle fut tout hors d’elle-mesme
tant elle paroissoit effrayée à l’abord de cette
habit de Cardinal, & cela à cause qu’elle auoit tant
oüy dire de maux du Cardinal de France qu’elle s’imaginoit
que tous les autres estoient aussi meschans
que luy, voicy le Caporal qui arriue, il demande qui
es-tu le Mazarin bouffant d’orgueil, & estimant
qu’on deuoit faire honnorable entrer à sa grosse pense,
dit ie suis Mazarin Cardinal, & comme il vouloit
suiure & dire de saincte Cecylle Archeuesque d’Aix
& le reste de ses belles qualitez. Ces deux parolles de
Mazarin Cardinal espouuenterent tellement ce Sergent
& cette sentinelle qu’on les vit incontinent dans
vn effroy extraordinaire & vn tremblement non
commun, ce qui les fit fuir en criant, aux armes, aux
armes, le voila venu ce Mazarin, & c’estoit tout ce
qu’ils pouuoient dire, tant ils estoient hors d’alaine, à